អាលែកហ្ស៊ី និងផ្ដាសាយ មានរោគសញ្ញាខុសគ្នាយ៉ាងម៉េចខ្លះ?

អ្នក​ដែល​ឧស្សាហ៍​កណ្ដាស់ ឬ​រមាស់​ច្រមុះ កុំ​គិត​ថា​នោះ​ជា​អាការៈ​ផ្ដាសាយ​ឲ្យ​សោះ ព្រោះ​បើ​តាម​វេជ្ជបណ្ឌិត ហ៊ាង រតនា បាន​បញ្ជាក់ នោះ​ក៏អាចជា​អាការៈ​​អាលែកហ្ស៊ី​តែ​ប៉ុណ្ណោះ។

លោក​បញ្ជាក់​ទៀត​ថា អាលែកហ្ស៊ី និង​ផ្ដាសាយ​ខុស​គ្នា​ស្រឡះ ដោយ​ផ្ដាសាយ​គឺ​បង្ក​ឡើង​ដោយ​មេរោគ ហើយ​អាលែកហ្ស៊ី​បង្ក​ឡើង​ដោយ​អាលែកជែន។ អាលែកជែន​បែង​ចែក​ជា ៣ អាច​មកពីចំណីអាហារ អាកាសធាតុ និង​របស់របរ​ប្រើប្រាស់ ឬ​អាច​ជា​ធូលី​ លម្អង​ផ្កា។ អាលែកហ្ស៊ី​ធ្វើឲ្យ​រលាក​ច្រមុះ ដោយ​មាន​អាការៈ​កណ្ដាស់ ឬ​រមាស់​ច្រមុះ​ចង់​កណ្ដាស់​រហូត​នោះ ហៅថា​អាលែកជីណេទិច។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

វេជ្ជបណ្ឌិត​ជំនាញ​ជំងឺ​ទូទៅ និង​កុមារ​រូប​នោះ​បាន​បន្ថែម​ទៀត​ថា មូលហេតុ​អាច​មកពី​រោម​ច្រមុះ​តិច មាន​ដុះ​សាច់​ក្នុង​ច្រមុះ និង​រលាក​ច្រមុះ​រ៉ាំរ៉ៃ ធ្វើឲ្យ​ងាយ​កណ្ដាស់ ពេល​បរិយាកាស​ហុយ ឬ​កម្ទេចកំទី​ប៉ើង​ចូល។

អាការៈ​ខុស​គ្នា​ជាច្រើន​ទៀត​មាន​ដូចជា៖

អាលែកហ្ស៊ី

– មិន​ក្ដៅ​ខ្លួន
– សម្បោរ​ថ្លា
– មិន​ឈឺ​ក្បាល
– មិន​ឈឺ​សាច់ដុំ
– រមាស់​ភ្នែក ច្រមុះ
– អាច​តឹង​ច្រមុះ
– អាលែកហ្ស៊ី​អាច​មាន​អាការៈ​ក្ដៅខ្លួន​ដែរ នៅ​ពេល​ធ្វើឲ្យ​រលាក ហើយ​រលាក​យូរ​ៗ​ទៅ​មេរោគ​ចូល

ផ្ដាសាយ

– ក្ដៅ​ខ្លួន
– សម្បោរ​ខាប់
– ឈឺ​ក្បាល
– ឈឺ​សាច់​ដុំ
– តឹង​ច្រមុះ​ខ្លាំង

អាលែកហ្ស៊ី​អាច​ព្យាបាល​ជា តែ​មិន​ជា​ដាច់​ឡើយ ប្រសិនបើ​យើង​អាច​ដឹង​ទាន់​ពេលវេលា និង​ព្យាបាល​ត្រឹមត្រូវ មិន​បង្ក​ឲ្យ​ស្ថានភាព​ធ្ងន់ធ្ងរ​ឡើយ។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet