ដំណឹងល្អ! សម្តេចតេជោ ប្រកាសផលិតវ៉ាក់សាំង ស៊ីណូហ្វាមខ្លួនឯង

រាជធានីភ្នំពេញ៖ សម្តេចតេជោ ហ៊ុន សែន​ នាយករដ្ឋមន្ត្រីកម្ពុជា បានប្រកាសថា ក្រៅពីការទទួលបានវ៉ាក់សាំងបង្ការជំងឹកូវីដ-១៩ជាជំនួយរបស់ប្រទេសជាមិត្ត កម្ពុជា បានដើរដល់ចំណុចមួយកម្រិតបន្ថែមទៀត គឺការរៀបចំផលិតវ៉ាក់សាំងបង្ការជំងឺកូវីដ-១៩ដោយខ្លួនឯង។

ការប្រកាសរបស់សម្តេចតេជោ បែបនេះ ធ្វើឡើងក្នុងសន្និសីទកាសែតរួមគ្នាជាមួយលោក វ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា ក្នុងឱកាសដែលលោកទាំង២ ទៅទទួលវ៉ាក់សាំងបង្ការជំងឺកូវីដ-១៩ចំនួន២លានដូសបន្ថែមទៀត ដែលជាជំនួយរបស់ចិន នៅព្រលានយន្តហោះភ្នំពេញ នាព្រឹកថ្ងៃទី១៧ ខែវិច្ឆិកា ឆ្នាំ២០២១។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងនោះដែរ សម្តេចតេជោ ហ៊ុន សែន លើកឡើងថា វ៉ាក់សំាង ដែលកម្ពុជា នឹងនាំចូល គឺជាប្រភេទវ៉ាក់សាំងស៊ីណូហ្វាម ឬស៊ីណូវ៉ាក់ ដែលមានប្រភពមកពីចិន។ វ៉ាក់សាំង ដែលនឹងនាំចូលនោះ គឺនៅជាវត្ថុធាតុដើមនៅឡើយ ដោយមិនទាន់ក្លាយជាផលិតផលចុងក្រោយនោះទេ តែនឹងត្រូវយកមកផលិតចេញជាផលិតផលសម្រេចចុងក្រោយនៅកម្ពុជា។
សម្តចនាយករដ្ឋមន្រ្តី បន្តថា ប្រទេសមួយចំនួនក្នុងអាស៊ាន ដូចជា ឥណ្ឌូណេស៊ី និងថៃ ជាដើម បានផលិតវ៉ាក់សាំងបង្ការជំងឺកូវីដ-១៩ខ្លួនឯងរួចមកហើយ។ សម្តេចបានលើកឡើងបន្ថែមទៀតថា កម្ពុជា ក៏មានលទ្ធភាពអាចផលិតវ៉ាក់សាំងបង្ការជំងឺកូវីដ-១៩ខ្លួនឯងបានដែរ។
ក្នុងសន្និសីទកាសែតរួមគ្នា សម្តេចនាយករដ្ឋមន្រ្តី បង្ហាញក្តីសង្ឃឹមថា លោក វ៉ាង វិនធាន នឹងពាំនាំសំណើរបស់ភាគីកម្ពុជា ទៅកាន់លោកប្រធានាធិបតីចិន ស៊ី ជិនភីង និងលោកនាយករដ្ឋមន្រ្តីចិន លី ខឹឈាំង ដើម្បីបើកឲ្យមានការផលិតវ៉ាក់សាំងបង្ការជំងឺកូវីដ-១៩នៅកម្ពុជា។ បើតាមសម្តេច កម្ពុជា ត្រូវផលិតវ៉ាក់សាំងបង្ការជំងឺកូវីដ-១៩ដោយខ្លួនឯង គឺដើម្បីធានាថា កម្ពុជា មានវ៉ាក់សាំងគ្រប់គ្រាន់ សម្រាប់ចាក់ជូនប្រជាជន ខណៈដែលមិនអាចដឹងថា ជំងឺកូវីដ-១៩ នៅកម្ពុជា នឹងត្រូវបញ្ចប់នៅពេលណា។
សម្តេចតេជោ ហ៊ុន សែន មានប្រសាសន៍ដូច្នេះថា៖

តែយ៉ាងណា សម្តេចតេជោ ហ៊ុន សែន ពុំបានបញ្ជាក់ឡើយថា កម្ពុជា នឹងអាចផលិតវ៉ាក់សាំងបង្ការជំងឺកូវីដ-១៩បាននៅពេលណា។ កាលពីខែមិថុនា ឆ្នាំ២០២១ ក្រសួងសុខាភិបាលកម្ពុជា បានប្រកាសឲ្យដឹងម្តងរួចមកហើយ ពីគម្រោងនៃការផលិតវ៉ាក់សាំងបង្ការជំងឺកូវីដ-១៩នៅកម្ពុជា។
ប្រមុខរដ្ឋាភិបាល អះអាងថា ពេលកម្ពុជា ផលិតវ៉ាក់សាំងបង្ការជំងឺកូវីដ-១៩បាន កម្ពុជា មិនត្រឹមតែយកវ៉ាក់សាំងនោះ មកប្រើប្រាស់ខ្លួនឯងទេ តែនៅអាចចែកចាយទៅប្រទេសដទៃថែមទៀត បើមានការបញ្ជាទិញ។

គួររំលឹកផងដែរថា គិតត្រឹមថ្ងៃទី១៦ ខែវិច្ឆិកា ឆ្នាំ២០២១នេះ កម្ពុជាបានសម្រេចលទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មាន​ ៨៧,៩៩ភាគរយ។ នេះបើតាមទិន្នន័យរបស់ក្រសួងសុខាភិបាល៕