ធ្លាប់ដឹងអត់ ស្រីៗ​ពពោះមួយចំនួន​អាចប្រឈមជំងឺខ្លាញ់រុំថ្លើម?

ជំងឺខ្លាញ់រុំថ្លើមពេលពពោះកើតឡើងនៅពេលមានខ្លាញ់ច្រើននៅក្នុងកោសិកាថ្លើមលើស្រ្តីពពោះ។ ជំងឺនេះកម្រកើតមាន តែអាចបង្កគ្រោះថ្នាក់ដល់ម៉ាក់ៗ និងកូនក្នុងផ្ទៃ ប្រសិន​បើ​ព្យាបាលមិនទាន់ពេល។ ម៉ាក់ៗ​ណាខ្លះអាចមានហានិភ័យ​ក្នុងការកើត​ជំងឺខ្លាញ់​រុំថ្លើម​ពេលពពោះ ហើយបញ្ហា​នេះ មានអាកាៈ និងរោគសញ្ញាអ្វីខ្លះ?

អ្នកវិទ្យាសាស្រ្តមិនទាន់ដឹងពីហេតុផលពិតប្រាកដដែលបណ្តាលឱ្យម៉ាក់ៗមានខ្លាញ់រុំថ្លើមពេលពពោះទេ ប៉ុន្តែតាមការស្រាវជ្រាវបានបង្ហាញថា ខ្លាញ់​រុំថ្លើមពេលពពោះ​អាចជា​បញ្ហា​តំណពូជដែលជះឥទ្ធិពលដល់ដំណើរការថ្លើមក្នុងការបំបែកខ្លាញ់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាធម្មតា ថ្លើមបំបែកទ្រីគ្លីសេរីត (ខ្លាញ់) និងអាស៊ីដខ្លាញ់ ប៉ុន្តែថ្លើមរបស់​ស្រ្តី​​ពពោះ​មួយ​ចំនួន​មិនអាចបំបែកខ្លាញ់ និងអាស៊ីដខ្លាញ់បានទេ ដូច្នេះបណ្តាលឱ្យមានខ្លាញ់​ច្រើន​នៅ​ក្នុងកោសិកាថ្លើម។

ម៉ាក់ៗដែលមានហានិភ័យមានខ្លាញ់រុំថ្លើមពេលពពោះគឺ​៖

• ពពោះលើកដំបូង
• ពពោះកូនភ្លោះ ២ ឬច្រើន
• ពពោះកូនប្រុស
• ពពោះទាំងមិនគ្រប់គីឡូ

ជាទូទៅ ជំងឺខ្លាញ់រុំថ្លើមពេលពពោះកើតឡើងក្នុងអំឡុងសប្តាហ៍ទី ៣៥ ឬ៣៦ ហើយមានអាការៈ និងរោគសញ្ញាដូចជា៖

• ចង្អោរ និងក្អួត
• ឈឺពោះ ជាពិសេសផ្នែកលើខាងស្តាំ
• អត់ស្រួលខ្លួន
• ឈឺក្បាល
• អស់កម្លាំង
• វង្វេង
• ស្បែក និងភ្នែកឡើងលឿង (ខាន់លឿង)

គ្រូពេទ្យនឹងធ្វើរោគវិនិច្ឆ័យជំងឺខ្លាញ់រុំថ្លើមពេលពពោះដោយ៖

• ពិនិត្យមើល ឬសាកសួរពីប្រវត្តិសុខភាពរបស់ម៉ាក់ៗ
• ធ្វើការពិនិត្យរាងកាយម៉ាក់ៗ
• ច្រិបជាលិកាថ្លើមដើម្បីយកទៅពិនិត្យក្រោមមីក្រូទស្សន៍
• អេកូថ្លើម
• ស្កេន CT

ប្រសិនបើម៉ាក់ធ្វើរោគវិនិច្ឆ័យឃើញថាមានជំងឺខ្លាញ់រុំថ្លើមពេលពពោះ គ្រូពេទ្យនឹង​សម្រាល​ទារកឱ្យលឿនតាមដែលអាចធ្វើទៅបាន ដើម្បីកាត់បន្ថយហានិភ័យ​សុខភាព​លើម៉ាក់ៗ និងទារក។

ម៉ាក់ៗអាចត្រូវការការថែទាំយ៉ាងយកចិត្តទុកដាក់រយៈពេលច្រើនថ្ងៃបន្ទាប់ពីការសម្រាលរួចរហូតដល់ស្ថានភាពប្រសើរឡើង។ ភាគច្រើន មុខងារ​ថ្លើមរបស់ម៉ាក់ៗ​នឹង​ត្រលប់​មកធម្មតាវិញក្នុងរយៈពេលពីរបីសប្តាហ៍​ក្រោយពីសម្រាលរួច។

ជំងឺខ្លាញ់រុំថ្លើមពេលពពោះអាចបណ្តាលឱ្យម៉ាក់ៗ និងគភ៌មានបញ្ហាសុខភាពដូចជា ខ្សោយ​ថ្លើម ធ្លាក់ឈាមធ្ងន់ធ្ងរ ខ្សោយតម្រងនោម ឬឆ្លងមេរោគធ្ងន់ធ្ងរ និង​អាច​បណ្តាល​ឱ្យមានគ្រោះថ្នាក់ដល់ជីវិត ប្រសិនបើមិន​បានព្យាបាលទាន់ពេល។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet