គួរដឹង! កត្ដាទាំងនេះអាចបណ្ដាលឲ្យខ្វះវីតាមីន C

វីតាមីនC គឺជាសារធាតុចិញ្ចឹមមាននៅក្នុងពពួកផ្លែឈើស្រស់ និងប្រភេទបន្លែបៃតងក្នុងរបបអាហាររបស់យើងប្រចាំថ្ងៃ។ ថ្វីដ្បិតសារធាតុនេះសម្បូរពិតមែន ប៉ុន្ដែរាងកាយរបស់យើងមិនអាចរក្សាវាទុកបានយូនោះទេ ហេតុនេះហើយទើបចាំបាច់ត្រូវតែញ៉ាំអាហារដែលមានជាតិវីតាមីន C ឲ្យបានរាល់ថ្ងៃ ទោះតិចឬច្រើន។

ជាមធ្យមសម្រាប់មនុស្សពេញវ័យត្រូវការវីតាមីន C ៧៥ មិល្លីក្រាមសម្រាប់បុរស ៩០មិល្លីក្រាមសម្រាប់ស្រ្ដី និង ១២០​មិល្លី​ក្រាមសម្រាប់អ្នកមានផ្ទៃពោះ ក្នុង​មួយ​ថ្ងៃ។ ដូច្នេះកាលណារាងកាយយើង ទទួលបានវីតាមីន C តិចជាងតម្រូវការចន្លោះចាប់ពី២ខែទៅ ៣ខែ នោះរាងកាយនឹងបង្ហាញរោគសញ្ញា ដូចជា មានអារម្មណ៍ចុះខ្សោយ អស់កម្លាំង មួរម៉ៅ ​(ទារក) ស្បែកស្ងួត ងាយជាំ ថប់ៗដង្ហើម ចុះខ្សោយប្រព័ន្ធភាពស៊ាំ និងគេងលក់មិនស្កប់ស្កល់ជាដើម។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កត្ដាសំខាន់ៗបណ្ដាលឲ្យរាងកាយខ្វះវីតាមីន C

ដោយសារតែរាងកាយរបស់យើងមិនអាចផលិតវីតាមីន C បានដោយខ្លួនឯង និងមិនអាចរក្សាទុកបានយូរសម្រាប់​​ប្រើប្រាស់ ដូច្នេះការបំពេញតម្រូវការរាងកាយ គឺត្រូវពឹងផ្អែកលើរបបអាហារប្រចាំថ្ងៃ និងពពួកអាហារបំប៉នទាំងស្រុង។ រាងកាយរបស់យើងក៏ងាយនឹងខ្វះវីតាមីន C បានដែរ ក្នុងករណីដូចជា៖

• របបអាហារប្រចាំថ្ងៃមានកម្រិតវីតាមីន C ទាប
• ស្ដ្រីមានផ្ទៃពោះ
• ការបំបៅដោះ
• មានរបួសហូរឈាមច្រើន និងការរលាកភ្លើង
• ជក់បារី
• រាករ៉ាំរៃ
• ក្រពេញទីរ៉ូអីតធ្វើការលើសកម្រិត
• មានជំងឺគ្រាប់ឈាម
• មិនឃ្លានអាហារ

ការធ្វើរោគវិនិច្ឆ័យ

ការធ្វើរោគវិនិច្ឆ័យ មាន៣វីធីដូចជា៖

• ត្រួតពិនិត្យលើរាងកាយ
• ធ្វើតេស្ដឈាម
• ថតកាំរស្មី អ៊ិច (ករណីនេះធ្វើចំពោះកុមារ មើលកំហាប់ឆ្អឹង និងការលូតលាស់)

តើរបបអាហារអ្វីខ្លះអាចផ្ដល់វីតាមីនC?

របបអាហារដែលអាចផ្ដល់វីតាមីន C បានមានដូចជា ពពួកផ្លែក្រូច ទំពាំងបាយជូរ ផ្លែគីវី ស្ដ្រប៊ឺរី ដំឡូង ប៉េងបោះ ម្នាស់ ឆេរី ត្របែក ស្វាយ ប៉ោមខៀវ ស្ពៃ ខាត់ណា និងប្រូខូលីជាដើម។ ដូច្នេះការទទួលទានអាហារដែលសម្បូរជីវជាតិ និងវីតាមីន C ច្រើន​នឹងមិនធ្វើឲ្យរាងកាយប្រឈមខ្វះវីតាមីនC ឡើយ។

តើមនុស្សប្រភេទណាប្រឈមហានិភ័យខ្វះវីតាមីន C ?

• ការសេពគ្រឿងស្រវឹង និង ជក់បារី
• ទារកញ៉ាំតែទឹកដោះគោ
• មនុស្សចាស់ញ៉ាំ​តែច្រើន​
• អ្នក​រស់នៅ​ក្នុង​ស្ថានភាព​សេដ្ឋកិច្ច​ទាប​
• បុគ្គលដែលមានបញ្ហាក្នុងការញ៉ាំអាហារ
• អ្នកមានបញ្ហាប្រព័ន្ធរំលាយអាហារ
• អ្នកលើសជាតិដែក ត្រូវបញ្ចេញវីតាមីន C តាមទឹកនោម
• អ្នកតមអាហារ

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet