កាត់បន្ថយការប្រើជណ្ដើរយន្ត! ការពិតការឡើងជណ្ដើរជើង មានអត្ថប្រយោជន៍ដល់អ្នកយ៉ាងខ្លាំង

យល់ដឹង៖ ជាទូទៅ ដើម្បីអាចសម្រេចកិច្ចការអ្វីមួយបាន គឺអ្នកត្រូវតែមានភាពឆ្លាតវៃផង និងមានកាយសម្បទារឹងមាំផង។ ការងារខ្លះ តម្រូវឲ្យអ្នកប្រើប្រាស់កម្លាំងពលកម្ម និងសកម្ម តែការងារខ្លះទៀតក៏ប្រើប្រាស់ខួរក្បាលគិត ច្រើនជាងការប្រើប្រាស់កាយសម្បទា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យ៉ាងណាមិញ សុខភាពរាងកាយពិតជាសំខាន់ស​ម្រាប់បុគ្គលគ្រប់រូប ហើយអ្នកដឹងទេថា ការធ្វើសកម្មភាពតូចតាចៗប្រចាំថ្ងៃដូចជាឡើងជណ្ដើរជើងជាដើម ក៏មានអត្ថប្រយោជន៍ខ្លាំងសម្រាប់សុខភាពរាងកាយដែរ?​

ខាងក្រោមនេះជាអត្ថប្រយោជន៍ទាំង៥ នៃការប្រើប្រាស់ជណ្ដើរជើង៖

១. គ្រាន់តែឡើងជណ្ដើរសោះ អាចជួយដុតកាឡូរីក្នុងខ្លួនច្រើនជាងរត់ត្រឹកៗទៅទៀត

អ្នកវិទ្យាសាស្ត្របានរកឃើញថា ការឡើងជណ្ដើរជើងពិតជាបានជួយដុតកាឡូរីក្នុងខ្លួនអ្នក ជាងការរត់ត្រឹកៗហាត់ប្រាណទៅទៀត ហើយការឡើងជណ្ដើរមួយកាំសោះ អាចជួយដុតកាឡូរីអ្នកបាន ០.១ កាឡូរីរាល់ពេលអ្នកឈានជើងឡើងជណ្ដើរមួយកាំ ហើយក៏ជួយដុតកាឡូរី ០.០៥ នៅពេលអ្នកចុះជណ្ដើរមួយកាំវិញ។​

២. ជួយកាត់បន្ថយហានិភ័យជំងឺដាច់សរសៃឈាមខួរក្បាល (Stroke)

យោងតាមលទ្ធផលស្រាវជ្រាវពី Havard Alumni បានបញ្ជាក់ថា បុរសជាង១១០០០នាក់ ដែលបានប្រើប្រាស់ជណ្ដើរជើងក្នុងសកម្មភាពប្រចាំថ្ងៃរបស់ពួកគេ គឺកាត់បន្ថយហានិភ័យនៃជំងឺដាច់សរសៃឈាមក្នុងខួរក្បាល។

៣. ធ្វើឲ្យសុខភាពបេះដូងរឹងមាំ

បើសិនជាអ្នកប្រើប្រាស់ជណ្ដើរជើងរាល់ថ្ងៃ សុខភាពបេះដូងអ្នកនឹងកាន់តែរឹងមាំក្នុងរយៈពេលវែង។​

៤. ជួយពង្រឹងសាច់ដុំ

អ្នកសាកល្បងគិតទៅមើល រាល់ពេលដែលអ្នកឡើងជណ្ដើរមួយកាំៗ អ្នកត្រូវប្រឹងប្រើកម្លាំងជើងទាំងអស់ ដើម្បីរុញខ្លួនអ្នកឲ្យឡើងលើ ទើបវាជាវិធីមួយដែលជួយពង្រឹងសាច់ដុំបានល្អខ្លាំងណាស់ ជាពិសេសសាច់ដុំជាប់ឆ្អឹង។ ការពង្រឹងសាច់ដុំជាប់ឆ្អឹងនេះ បានជួយសម្រួលដល់ការធ្វើមេតាបូលីស និងពង្រឹងជាតិស្ករក្នុងឈាមផងដែរ។​

៥. ជួយឲ្យអ្នកមានរបៀបរបបជីវិតរស់នៅដ៏សកម្ម

ឥឡូវនេះ តិកណូឡូជីបានជួយសម្រួលដល់ការងារធ្ងន់ៗច្រើន និងការងារដែលត្រូវការប្រើកម្លាំង ដូចជាមានជណ្ដើរយន្តជំនួសជណ្ដើរជើង។ ប៉ុន្តែបើសិនអ្នកជ្រើសរើសឡើងជណ្ដើរជើង គឺវាធ្វើឲ្យរាងកាយអ្នកផ្លាស់ទីបានច្រើនជាងមុន សម្រួលដល់សរសៃឈាម និងធ្វើឲ្យជីវិតអ្នកសកម្មផងដែរ៕

ប្រភព៖: verywellhealth

• ជីវិត
• មេរៀនជីវិត