អត្ថប្រយោជន៍ទាំង៥យ៉ាង នៃសណ្តែកដី!

សណ្តែកដី ជាអាហារសម្រន់ដ៏ល្អ ងាយរក ងាយញុំានិងមានតំលៃធូរថ្លៃ។ គ្រាប់ធញ្ញជាតិនេះ មិនត្រឹមឆ្ងាញ់ទេ តែសំបូរទៅដោយសារធាតុចិញ្ចឹមដូចជាប្រូតេអ៊ីន វីតាមីនជាច្រើនប្រភេទ សារធាតុរ៉ែសំខាន់ៗ ដែលខ្លួនប្រាណយើងត្រូវការយ៉ាងច្រើនទៀតផង សម្រាប់ការលូតលាស់ និងសុខភាពរាងកាយទាំងមូល។

ខាងក្រោមជាអត្ថប្រយោជន៍សុខភាពទាំង៥ បានពីការហូបសណ្តែកដីជាប្រចាំ៖

១. ប្រឆាំងនឹងជំងឺទឹកនោមផ្អែម

ជាការពិត ជំងឺទឹកនោមផ្អែមភាគច្រើនបណ្តាលមកពីបញ្ហានៃអរម៉ូនអាំងស៊ុយលីនដែលបញ្ចេញមកមានភាពរេស៊ីស្តង់ជាមួយកោសិកា ហើយបណ្តាលឱ្យកោសិកាពុំអាចធ្វើការស្រូបយកជាតិស្ករនៅសល់បាន។

ប៉ុន្តែការហូបសណ្តែកដី មិនត្រឹមតែផ្តល់ថាមពលប៉ុណ្ណោះទេ  វាថែមទាំងផ្ទុក បរិមាណជាតិស្ករតិចតួចទៀតផង ដូចជាក្នុង ១០០ក្រាមនៃសណ្តែកដីមានជាតិស្ករត្រឹមតែ ១០ក្រាមតែប៉ុណ្ណោះ។

ជាពិសេសទៅទៀត សណ្តែកដីសំបូរទៅដោយមង់កាណែស ដែលជាសារធាតុរ៉ែដ៏សំខាន់ចូលរួមចំណែកក្នុងរក្សាកម្រិតជាតិស្ករឲ្យនៅធម្មតា  ដោយសារតែសារធាតុមួយនេះបានភ្ញោចឲ្យកោសិកាធ្វើមេតាប៉ូលីសខ្លាញ់និងស្ករ ដែលធ្វើឲ្យបរិមាណជាតិស្ករហូរក្នុងឈាម អាចចូលក្នុងកោសិកាបាន។  កត្តានេះជួយដល់ដំណើរការនៃអរម៉ូនអាំងស៊ុយលីន ដូច្នេះហានិភ័យនៃជំងឺទឹកនោមផ្អែមក៏ទាបដែរ។ 

២. ប្រឆាំងនឹងគ្រួសក្នុងប្រម៉ាត់

អ្នកដឹងទេថា គ្រួសក្នុងប្រម៉ាត់ពុំមែនបណ្តាលមកពីការហូបលើសសារធាតុរ៉ែនោះទេ ប៉ុន្តែតាមពិតទៅវាបណ្តាលមកពីសារធាតុកូលេស្តេរ៉ុលដែលមានក្នុងទឹកប្រម៉ាត់ច្រើនពេក  ទើបធ្វើសារធាតុកូលេស្តេរ៉ុលបំលែងទៅជារូបធាតុមួយស្រដៀងនឹងដុំគ្រួស។

បើទោះបីជាយ៉ាងណាក៏ដោយ សណ្តែកដីមានផ្ទុកនូវសារធាតុអាស៊ីតខ្លាញ់ពិសេសម៉្យាង ដែលជួយកាត់បន្ថយសារធាតុកូលេស្តេរ៉ុលមិនល្អ។ កត្តានេះអាចជួយកាត់បន្ថយហានិភ័យនៃបញ្ហាគ្រួសក្នុងតំរង់នោមបាន។

៣. ល្អសម្រាប់ការចងចាំ

សណ្តែកដីមានផ្ទុក Vitamin B3 និងសារធាតុប្រឆាំងជាតិពុលពិសេសម៉្យាង ដែលបានរកឃើញថា វាជួយបង្កើនបរិមាណលំហូរឈាមទៅកាន់ខួរក្បាល និងជាពិសេស វាការពារពីការខូចខាតនៃកោសិកាសរសៃប្រសាទនៃខួរក្បាល។ លើសពីនេះ គេជឿថាសារធាតុទាំងនេះ មានផ្សំនៅក្នុងថ្នាំព្យាបាលនៃអ្នកជំងឺវង្វេងវង្វាន់ ដើម្បីបញ្ឈប់បរិមាណខូចខាតនៃកោសិកាប្រសាទ។ 

៤. ប្រឆាំងនឹងជំងឺដាច់សរសៃឈាមខួរក្បាល

ដូចបានរៀបរាប់ខាងលើមកអីចឹង សារធាតុចិញ្ចឹមនៃសណ្តែកដី បានចូលរួមចំណែកក្នុងការកាត់បន្ថយបរិមាណសារធាតុកូលេស្តេរ៉ុលមិនល្អ  ដែលជាដើមហេតុនៃជំងឺដាច់សរសៃឈាម  ព្រោះសារធាតុកូលេស្តេរ៉ុលអាចប្រមូលផ្តុំជាកករមួយដ៏ក្រាស់ ដែលធ្វើឱ្យរន្ធសរសៃឈាមរួមតូចរហូតដល់ស្ទះ  ហើយសរសៃខួរក្បាលងាយស្ទះ និងដាច់ជាងគេ។ ​ ជាលទ្ធផលវាបណ្តាលឲ្យយើងសន្លប់ភ្លាមៗ ឬក៏អាចបណ្តាលឲ្យស្លាប់ទៀតផង។

៥. សុខភាពស្បែក

សណ្តែកសំបូរទៅដោយវីតាមីន E & B និងសារធាតុខ្លាញ់ល្អ ដែលដើរតួនាទីយ៉ាងសំខាន់សម្រាប់ភាពហាប់ណែននៃទ្រង់ទ្រាយ និងសំបកខាងក្រៅរបស់កោសិកាស្បែក។ ជាលទ្ធផល វាការពារកោសិកាស្បែកយើងពីការបាត់បង់ជាតិទឹក ធ្វើឲ្យស្បែកមានភាពសំណើម និងជាពិសេសការពារពុំឲ្យមានការជ្រាបចូលនៃមេរោគ និង សារធាតុពីខាងក្រៅចូលតាមស្បែក៕